ఓ మనిషిlllమార్గం కృష్ణ మూర్తిlllహైదరాబాద్

ఓ మనిషి

ఓ మనిషీ!
ముసి ముసి నవ్వులతో
మురిసి పోతున్నావు

కూసమిడిచిన పాము వోలె
బుస కొడుతున్నావు

ఎందుకో ఈ ఎగిసి పాటు
ఎందుకో ఈ మిడిసి పాటు

నిరు పేదలపై , అమాయకులపై
ఎందుకంత ఏవగింపు

నీవు
అమ్మ కడుపు
నుండీ గాక ఆకాశం
నుండి ఊడి పడ్డావా?

చదువుల సరస్వతిని గణపతి వోలె
పుక్కెట పట్టి పుట్టావా?

బంగారు గనిని ధన లక్ష్మి వోలె
బుజాన పెట్టుకుని వచ్చావా?

అంతా నాకే తెలుసనే
అహంకారమెందుకు?

అందరూ నాకంటే తక్కువనే
అహంభావ మెందుకు?

ఒక్క సారి ఆత్మ విమర్శ
చేసుకో
నేనూ ఒక మనిషినేనని
గుర్తు పెట్టుకో

కుల మత విభేదాలు సృష్టించి
రాష్ట్రాలలో , దేశంలో
అల జడులు సృష్టిస్తావు

బ్యాంకులను కొల్లగొట్టి
విదేశాల్లో దాక్కుంటావు

నోట్లను ఎరవేసి ఓట్లు
దండుకుంటావు

పేదలను దోచుకుని
విదేశీ బ్యాంకుల్లో ,
వ్యాపార సంస్థలలో
పెట్టు బడులు పెడుతావు

అమాయకపు అబలలపై
అఘాయిత్యాలు చేసి
ఏమీ ఎరుగ నట్లు నటిస్తావు

నమ్మిన నరులను మోసం చేసి
కోట్లు పోగేస్తావు

అమ్మా నాన్నలను
అనాధ ఆశ్రయాల్లో వేస్తావు

ఈ శరీరం ఈ సంపద
నీ భార్యా పిల్లలు,
బంధువులు, మిత్రులు
శాశ్వతమనుకుంటున్నావా?

నీ నడ్డిని విరిచే రోజు
దగ్గరలోనే ఉంది
నీ పాపాలను చిత్రగుప్తుడు
లిఖిస్తూనే ఉన్నాడు

నీ పాపాల చిట్టా
నిండు కుంటున్నది

నీకు పడే శిక్షలు
ఎక్కడో కాదు, ఎప్పుడో కాదు
నీవున్న లోకాననే, నీవు బ్రతికుండగానే!